Nyleg vart det kjent at politikarane i Telemark vil ha slutt på klede og effektar som signaliserer kva russegruppe elevar tilhøyrer. Hovudutvalet for utdanning, tannhelse og folkehelse vedtok eit forbod mot slike klede i skuletida og bestemde seg for å gjere dette til ein del av skulereglementet. No er det klart at dette forbodet først vil gjelde frå 01.08.2026.
-Vi synest det er mest ryddig at reglane trer i kraft neste skuleår, seier fylkessjef for utdanning, Helge Galdal.
Dermed kan dagens Vg3-elevar forhalde seg til noverande skulereglement, som ikkje seier noko om bruk av russeklede.
-Samtidig vil vi presisere at vi skal jobbe med intensjonen bak vedtaket allereie no. Vi er opptekne av at alle elevar skal vere trygge på skulen og kjenne seg inkluderte i skulemiljøet. Bruk av russegruppe-klede er ein del av dette.
Framtidige avgangselevar får no god tid til å førebu seg på dei nye reglane og dei får også høve til å seie si meining. Forslag til nye skulereglar vil bli sendt ut på høyring og vil endeleg vedtakast av politikarane i juni 2026.